dhaDkanen ban ke jo sine mein raha karta tha

dhaḌkaneñ ban ke jo siine meñ rahā kartā thā

kyā ajab shaḳhs thā jo mujh meñ jiyā kartā thā

nāḳhun-e-vaqt ne har naqsh khurach Daalā hai

merā chehra mirī pahchān huā kartā thā

kaa.ī hoñToñ pe hama-vaqt jamī rahtī thī

ek dariyā mirī āñkhoñ meñ thamā kartā thā

ik talātum thā tah-e-āb sukūt-e-dariyā

dil-e-ḳhāmosh meñ ik shor rahā kartā thā

murta.ish hotā thā jab ḳhāma-e-añgusht kabhī

kyā kyā qirtās-e-ḳhalā par maiñ likhā kartā thā

zehn-o-dil is liye sargarm-e-amal rahte the

rahnumā.ī mirī har vaqt ḳhudā kartā thā

ābla-pā.iyāñ kartī thiiñ agar dil-shikanī

hausla phir rah-e-ummīd ko vā kartā thā

ho gayā nazr bil-āḳhir mirī haq-goī kī

ek sar jo kabhī shānoñ pe sajā kartā thā

kyā huā aaj ai 'sālim' vo shu.ūr-e-bāliġh

jo qalam-zad tirī tahrīr kiyā kartā thā

dhaDkanen ban ke jo sine mein raha karta tha

kya ajab shaKHs tha jo mujh mein jiya karta tha

naKHun-e-waqt ne har naqsh khurach Dala hai

mera chehra meri pahchan hua karta tha

kai honTon pe hama-waqt jami rahti thi

ek dariya meri aankhon mein thama karta tha

ek talatum tha tah-e-ab sukut-e-dariya

dil-e-KHamosh mein ek shor raha karta tha

murtaish hota tha jab KHama-e-angusht kabhi

kya kya qirtas-e-KHala par main likha karta tha

zehn-o-dil is liye sargarm-e-amal rahte the

rahnumai meri har waqt KHuda karta tha

aabla-paiyan karti thin agar dil-shikani

hausla phir rah-e-ummid ko wa karta tha

ho gaya nazr bil-aKHir meri haq-goi ki

ek sar jo kabhi shanon pe saja karta tha

kya hua aaj ai 'salim' wo shuur-e-baaligh

jo qalam-zad teri tahrir kiya karta tha