Dhal gai shab charaghon ki lau baDh gai sham-e-bimar-e-gham ki sahar ho gai

Dhal ga.ī shab charāġhoñ kī lau baḌh ga.ī shām-e-bīmār-e-ġham kī sahar ho ga.ī

lo marīz-e-shab-e-ġham ko niiñd aa ga.ī dāstān-e-alam muḳhtasar ho ga.ī

yuuñ kiyā hai adā sajda-e-bandagī hashr uTThe magar sar uThāyā nahīñ

ab kisī āshnā kī zarūrat nahīñ ab jabīñ hāsil-e-sang-e-dar ho ga.ī

shām-e-ġham ab vo aa.eñ na aa.eñ magar un kā vā'da to hai vo zarūr ā.eñge

ab sahar ho na ho is kī parvā nahīñ kyā ye kam hai umīd-e-sahar ho ga.ī

maiñ huuñ vo rahrav-e-rāh-e-'ishq-e-vafā jab bhī manzil kī jānib uThā.e qadam

merā josh-e-junūñ rāhbar ban gayā merī dīvāngī ham-safar ho ga.ī

chārāgar ab ‘ilāj-e-ġham-e-dil na kar apnī barbādiyoñ kā mujhe ġham nahīñ

kyā ye kam hai unheñ e'tibār aa gayā mere miTne pe aañkh un kī tar ho ga.ī

mai-kada chhuT gayā sahn-e-gulshan chhuTā tere ġham ke liye do-jahāñ chhuT ga.e

ab na jiine kī parvā na marne kā ġham zindagī yaas kī rahguzar ho ga.ī

tīrgī-e-alam duur kab ho sakī ham ne dil ko bhī apne jalāyā 'aqīl'

dil sulagte sulagte dhuāñ ho gayā jalte jalte ise raat bhar ho ga.ī

Dhal gai shab charaghon ki lau baDh gai sham-e-bimar-e-gham ki sahar ho gai

lo mariz-e-shab-e-gham ko nind aa gai dastan-e-alam muKHtasar ho gai

yun kiya hai ada sajda-e-bandagi hashr uTThe magar sar uThaya nahin

ab kisi aashna ki zarurat nahin ab jabin hasil-e-sang-e-dar ho gai

sham-e-gham ab wo aaen na aaen magar un ka wa'da to hai wo zarur aaenge

ab sahar ho na ho is ki parwa nahin kya ye kam hai umid-e-sahar ho gai

main hun wo rahraw-e-rah-e-'ishq-e-wafa jab bhi manzil ki jaanib uThae qadam

mera josh-e-junun rahbar ban gaya meri diwangi ham-safar ho gai

chaaragar ab ‘ilaj-e-gham-e-dil na kar apni barbaadiyon ka mujhe gham nahin

kya ye kam hai unhen e'tibar aa gaya mere miTne pe aankh un ki tar ho gai

mai-kada chhuT gaya sahn-e-gulshan chhuTa tere gham ke liye do-jahan chhuT gae

ab na jine ki parwa na marne ka gham zindagi yas ki rahguzar ho gai

tirgi-e-alam dur kab ho saki hum ne dil ko bhi apne jalaya 'aqil'

dil sulagte sulagte dhuan ho gaya jalte jalte ise raat bhar ho gai