dhanak lala shafaq jugnu sitara dekhta hai wo

dhanak laala shafaq jugnū sitāra dekhtā hai vo

sadā ḳhush-rang raushan isti.āra dekhtā hai vo

kabhī ḳhud aap apnā hausla pāyāb hone kā

kabhī hasrat se dariyā kā kināra dekhtā hai vo

ajab mutazād-hāsil kārobār-e-shauq hai us kā

ifāda sochtā hai to ḳhasāra dekhtā hai vo

zamāna mahv-e-hairat hai ki bujhtī raakh ke andar

havā de de ke āḳhir kyā sharāra dekhtā hai vo

abhī to shaam ke saa.e bhī mahrā.e na āñkhoñ meñ

abhī se āḳhir-e-shab kā sitāra dekhtā hai vo

shajar jis se koī ummīd-e-barg-o-bār bar aatī

usī pe zard mausam kā ijāra dekhtā hai vo

jahāñ us ne banā rakkhā hai kāġhaz kā makāñ 'shahzād'

usī jānib havāoñ kā ishāra dekhtā hai vo

dhanak lala shafaq jugnu sitara dekhta hai wo

sada KHush-rang raushan istiara dekhta hai wo

kabhi KHud aap apna hausla payab hone ka

kabhi hasrat se dariya ka kinara dekhta hai wo

ajab mutazad-hasil karobar-e-shauq hai us ka

ifada sochta hai to KHasara dekhta hai wo

zamana mahw-e-hairat hai ki bujhti rakh ke andar

hawa de de ke aaKHir kya sharara dekhta hai wo

abhi to sham ke sae bhi mahrae na aankhon mein

abhi se aaKHir-e-shab ka sitara dekhta hai wo

shajar jis se koi ummid-e-barg-o-bar bar aati

usi pe zard mausam ka ijara dekhta hai wo

jahan us ne bana rakkha hai kaghaz ka makan 'shahzad'

usi jaanib hawaon ka ishaara dekhta hai wo