dhanak se phul se barg-e-hina se kuchh nahin hota

dhanak se phuul se barg-e-hinā se kuchh nahīñ hotā

badan sahrā hue āb-o-havā se kuchh nahīñ hotā

bahut kuchh dosto bismil ke chup rahne se hotā hai

faqat us ḳhanjar-e-dast-e-jafā se kuchh nahīñ hotā

agar vus.at na diije vahshat-e-jāñ ke ilāqe ko

to phir āzādī-e-zanjīr-e-pā se kuchh nahīñ hotā

koī koñpal nahīñ is ret kī tah meñ to kyā nikle

yahāñ ai sāda-dil kaalī ghaTā se kuchh nahīñ hotā

azal se kuchh ḳharābī hai kamānoñ kī samā.at meñ

parindo shoḳhī-e-saut-o-sadā se kuchh nahīñ hotā

chalo ab āsmāñ se aur koī rābta socheñ

bahut din ho ga.e harf-e-duā se kuchh nahīñ hotā

dhanak se phul se barg-e-hina se kuchh nahin hota

badan sahra hue aab-o-hawa se kuchh nahin hota

bahut kuchh dosto bismil ke chup rahne se hota hai

faqat us KHanjar-e-dast-e-jafa se kuchh nahin hota

agar wusat na dije wahshat-e-jaan ke ilaqe ko

to phir aazadi-e-zanjir-e-pa se kuchh nahin hota

koi konpal nahin is ret ki tah mein to kya nikle

yahan ai sada-dil kali ghaTa se kuchh nahin hota

azal se kuchh KHarabi hai kamanon ki samaat mein

parindo shoKHi-e-saut-o-sada se kuchh nahin hota

chalo ab aasman se aur koi rabta sochen

bahut din ho gae harf-e-dua se kuchh nahin hota