dhimi dhimi aanch pe gham ki dil ka lahu kam jalta hai

dhīmī dhīmī aañch pe ġham kī dil kā lahū kam jaltā hai

bhīgī palkoñ ke saa.e meñ dīda-e-pur-nam jaltā hai

kūcha-e-jānāñ meñ shab-e-ġham ik sham-e-vafā bhī yuuñ na jalī

mere dahān-e-zaḳhm pe jaise pamba-e-marham jaltā hai

garche dil-e-zinda hai mirā ab shahr-e-ḳhamoshāñ kī tasvīr

ek charāġh-e-hasrat-e-pāmāl aaj bhī har dam jaltā hai

phuul khile haiñ gulshan meñ yā aag lagī hai chaar taraf

taḳhta-e-gul ke sho.aloñ par hī gauhar-e-shabnam jaltā hai

barbat-e-hastī ko ishq apnā zaḳhma-e-ḳhush-āhang huā

'barq' yahāñ ḳhāmosh laboñ par husn ke sargam jaltā hai

dhimi dhimi aanch pe gham ki dil ka lahu kam jalta hai

bhigi palkon ke sae mein dida-e-pur-nam jalta hai

kucha-e-jaanan mein shab-e-gham ek sham-e-wafa bhi yun na jali

mere dahan-e-zaKHm pe jaise pamba-e-marham jalta hai

garche dil-e-zinda hai mera ab shahr-e-KHamoshan ki taswir

ek charagh-e-hasrat-e-pamal aaj bhi har dam jalta hai

phul khile hain gulshan mein ya aag lagi hai chaar taraf

taKHta-e-gul ke shoalon par hi gauhar-e-shabnam jalta hai

barbat-e-hasti ko ishq apna zaKHma-e-KHush-ahang hua

'barq' yahan KHamosh labon par husn ke sargam jalta hai