dhoka hai agar aankh mein qatil ki nami hai

dhoka hai agar aañkh meñ qātil kī namī hai

sho'loñ pe kahīñ aaj talak barf jamī hai

pattoñ kī sadā.eñ haiñ ki majbūr kā nauha

par mere daraḳhtoñ se havā bāñdh ga.ī hai

yā to mirī bastī ke sabhī log haiñ andhe

yā halqa-e-āfāq meñ sūraj kī kamī hai

har shaḳhs hai mahrūm yahāñ fikr-e-rasā se

fitrat meñ abhī tak vahī shorīda-sarī hai

rū-posh nigāhoñ se hai hangāma-e-fardā

ā.īna-e-idrāk pe bhī gard jamī hai

vo quvvat-e-bāzū hai na himmat na shujā'at

talvār paḌī apnā hī dam chaaT rahī hai

kavvoñ se laraztā hai abābīl kā lashkar

shāhīn kī taqdīr meñ be-bāl-o-parī hai

ab vā'iz-o-zāhid haiñ baham dast-o-garebāñ

ik jang-e-jamal aaj masājid meñ chhiḌī hai

jo rāñda-e-dargāh the vo taḳht-nashīñ haiñ

me'yār-e-faqīrī nahīñ daryūza-garī hai

fir’aun kī aulād ga.ī shams-o-qamar tak

aur āl-e-nabī niil ke sāhil pe khaḌī hai

iblīs bhī paanī ke liye dauḌ rahā hai

lagtā hai ki dozaḳh meñ kahīñ aag lagī hai

sachchā.ī se us shaḳhs kī derīna 'adāvat

tārīḳh ko dīmak kī tarah chaaT rahī hai

āñdhī to uḌā le ga.ī kāshāna-e-muflis

zālim kī havelī abhī mahfūz khaḌī hai

sailāb jo aaya use sahrā ne dabochā

bijlī bhī kahīñ jā ke samundar meñ girī hai

ham-sāya uThā laatā hai ghar meñ man-o-salvā

par merī anā hai ki mujhe rok rahī hai

dhoka hai agar aankh mein qatil ki nami hai

sho'lon pe kahin aaj talak barf jami hai

patton ki sadaen hain ki majbur ka nauha

par mere daraKHton se hawa bandh gai hai

ya to meri basti ke sabhi log hain andhe

ya halqa-e-afaq mein suraj ki kami hai

har shaKHs hai mahrum yahan fikr-e-rasa se

fitrat mein abhi tak wahi shorida-sari hai

ru-posh nigahon se hai hangama-e-farda

aaina-e-idrak pe bhi gard jami hai

wo quwwat-e-bazu hai na himmat na shuja'at

talwar paDi apna hi dam chaT rahi hai

kawwon se larazta hai ababil ka lashkar

shahin ki taqdir mein be-baal-o-pari hai

ab wa'iz-o-zahid hain baham dast-o-gareban

ek jang-e-jamal aaj masajid mein chhiDi hai

jo randa-e-dargah the wo taKHt-nashin hain

me'yar-e-faqiri nahin daryuza-gari hai

fir’aun ki aulad gai shams-o-qamar tak

aur aal-e-nabi nil ke sahil pe khaDi hai

iblis bhi pani ke liye dauD raha hai

lagta hai ki dozaKH mein kahin aag lagi hai

sachchai se us shaKHs ki derina 'adawat

tariKH ko dimak ki tarah chaT rahi hai

aandhi to uDa le gai kashana-e-muflis

zalim ki haweli abhi mahfuz khaDi hai

sailab jo aaya use sahra ne dabocha

bijli bhi kahin ja ke samundar mein giri hai

ham-saya uTha lata hai ghar mein man-o-salwa

par meri ana hai ki mujhe rok rahi hai