Dhol ki thap pe raqs kunan hai jhunD ek ThanDi chhanw ka

Dhol kī thaap pe raqs kunāñ hai jhunD ik ThanDī chhāñv kā

haaḌ mahīne aan lagā hai mela mere gaañv kā

mire vujūd meñ dhartī jaisī hariyālī bhī ḳhushkī bhī

maiñ dariyā kā beTā huuñ aur bāshinda sahrāoñ kā

kitnī lok kathā.eñ mere kamre meñ ab bikhrī haiñ

raat kī raat musāfir Thahrā an-dekhī duniyāoñ kā

ek buzurg kahā karte the har barsāt ke mausam meñ

ab kī baar nahīñ hai vaisā andhā zor havāoñ kā

kaun takegā jangal jangal phailī piilī beloñ ko

kaun sunegā aa kar nauha in sūkhe dariyāoñ kā

qabristān ke ek mazār pe jab se dhāgā bāñdhā hai

ummīdoñ ke bor se jhorā apnā peḌ du'āoñ kā

raat ke sannāTe meñ 'qāsim' kaan lage darvāze ko

aur galī meñ āhista se baḌhtā shor khaḌāoñ kā

Dhol ki thap pe raqs kunan hai jhunD ek ThanDi chhanw ka

haD mahine aan laga hai mela mere ganw ka

mere wujud mein dharti jaisi hariyali bhi KHushki bhi

main dariya ka beTa hun aur bashinda sahraon ka

kitni lok kathaen mere kamre mein ab bikhri hain

raat ki raat musafir Thahra an-dekhi duniyaon ka

ek buzurg kaha karte the har barsat ke mausam mein

ab ki bar nahin hai waisa andha zor hawaon ka

kaun takega jangal jangal phaili pili belon ko

kaun sunega aa kar nauha in sukhe dariyaon ka

qabristan ke ek mazar pe jab se dhaga bandha hai

ummidon ke bor se jhora apna peD du'aon ka

raat ke sannaTe mein 'qasim' kan lage darwaze ko

aur gali mein aahista se baDhta shor khaDaon ka