dhuan bana ke faza mein uDa diya mujhko

dhuāñ banā ke fazā meñ uḌā diyā mujh ko

maiñ jal rahā thā kisī ne bujhā diyā mujh ko

taraqqiyoñ kā fasāna sunā diyā mujh ko

abhī hañsā bhī na thā aur rulā diyā mujh ko

maiñ ek zarra bulandī ko chhūne niklā thā

havā ne tham ke zamīñ par girā diyā mujh ko

safed sañg kī chādar lapeT kar mujh par

fasīl-e-shahr pe kis ne sajā diyā mujh ko

khaḌā huuñ aaj bhī roTī ke chaar harf liye

savāl ye hai kitāboñ ne kyā diyā mujh ko

na jaane kaun sā jazba thā jis ne ḳhud hī 'nazīr'

mirī hī zaat kā dushman banā diyā mujh ko

dhuan bana ke faza mein uDa diya mujh ko

main jal raha tha kisi ne bujha diya mujh ko

taraqqiyon ka fasana suna diya mujh ko

abhi hansa bhi na tha aur rula diya mujh ko

main ek zarra bulandi ko chhune nikla tha

hawa ne tham ke zamin par gira diya mujh ko

safed sang ki chadar lapeT kar mujh par

fasil-e-shahr pe kis ne saja diya mujh ko

khaDa hun aaj bhi roTi ke chaar harf liye

sawal ye hai kitabon ne kya diya mujh ko

na jaane kaun sa jazba tha jis ne KHud hi 'nazir'

meri hi zat ka dushman bana diya mujh ko