dhuan dhuan hai gham-e-gardish-e-safar se charagh

dhuāñ dhuāñ hai ġham-e-gardish-e-safar se charāġh

ajiib sahme hue haiñ havā ke Dar se charāġh

ajab tilism-kada hai ye jabr fitrat kā

ki raushnī meñ rahe raushnī ko tarse charāġh

ye ḳhāmushī kā bayābāñ ye shab kā koh-e-sukūt

ye ḳhvāb ḳhvāb sā manzar ye be-ḳhabar hai charāġh

ye vaqt aisā samundar ki jis ke dāman meñ

sadaf sadaf sī haiñ rāteñ guhar guhar se charāġh

mirī ragoñ meñ lahū kī shuā ho ki na ho

hazār-hā haiñ farozāñ mire hunar se charāġh

maiñ kyā dikhā.ūñ urūs-e-ġhazal kā rang-e-jamāl

abhī 'ayāz' bahut duur hai nazar se charāġh

dhuan dhuan hai gham-e-gardish-e-safar se charagh

ajib sahme hue hain hawa ke Dar se charagh

ajab tilism-kada hai ye jabr fitrat ka

ki raushni mein rahe raushni ko tarse charagh

ye KHamushi ka bayaban ye shab ka koh-e-sukut

ye KHwab KHwab sa manzar ye be-KHabar hai charagh

ye waqt aisa samundar ki jis ke daman mein

sadaf sadaf si hain raaten guhar guhar se charagh

meri ragon mein lahu ki shua ho ki na ho

hazar-ha hain farozan mere hunar se charagh

main kya dikhaun urus-e-ghazal ka rang-e-jamal

abhi 'ayaz' bahut dur hai nazar se charagh