dhuan-dhuan hai sar-e-asman KHuda-hafiz

dhuāñ-dhuāñ hai sar-e-āsmāñ ḳhudā-hāfiz

dhaḌak rahā hai dil-e-nā-tavāñ ḳhudā-hāfiz

na koī mīr-e-safar hai na koī manzil hai

bhaTak rahā hai mirā kārvāñ ḳhudā-hāfiz

na iltifāt na pursish na vāsta na kalām

vo ho ga.e haiñ bahut bad-gumāñ ḳhudā-hāfiz

na jaane ahl-e-vafā par ab aur kyā guzre

badal rahā hai nizām-e-jahāñ ḳhudā-hāfiz

chalā thā saath magar raat ke añdhere meñ

bichhaḌ gayā vo kahīñ mehrbāñ ḳhudā-hāfiz

bharī bahār meñ ye haal hai gulistāñ kā

muhīt rahtī hai har dam ḳhizāñ ḳhudā-hāfiz

'jamīl' yaad hai ab tak ki dīda-e-tar se

kahā thā us ne tah-e-sā.ebāñ ḳhudā-hāfiz

dhuan-dhuan hai sar-e-asman KHuda-hafiz

dhaDak raha hai dil-e-na-tawan KHuda-hafiz

na koi mir-e-safar hai na koi manzil hai

bhaTak raha hai mera karwan KHuda-hafiz

na iltifat na pursish na wasta na kalam

wo ho gae hain bahut bad-guman KHuda-hafiz

na jaane ahl-e-wafa par ab aur kya guzre

badal raha hai nizam-e-jahan KHuda-hafiz

chala tha sath magar raat ke andhere mein

bichhaD gaya wo kahin mehrban KHuda-hafiz

bhari bahaar mein ye haal hai gulistan ka

muhit rahti hai har dam KHizan KHuda-hafiz

'jamil' yaad hai ab tak ki dida-e-tar se

kaha tha us ne tah-e-saeban KHuda-hafiz