dhuan dhuan sabhi manzar dikhai dete hain

dhuāñ dhuāñ sabhī manzar dikhā.ī dete haiñ

mujhe sulagte hue ghar dikhā.ī dete haiñ

mudāfa'at kā salīqa bhī ḳhūb-tar hai ye

har ek haath meñ patthar dikhā.ī dete haiñ

'azīz haiñ jo dil-o-jāñ se bhī mujhe baḌh kar

sadā vahī to sitamgar dikhā.ī dete haiñ

nazar uThātī huuñ jab apne ḳhema-e-jāñ par

qadam qadam baḌe mahshar dikhā.ī dete haiñ

qarīb jā.ūñ to sahrā kī misl haiñ vo bhī

tirī nazar meñ jo sāgar dikhā.ī dete haiñ

ye nā-rasā.ī ke saare añdhere mujh tak haiñ

jo duur se mah-o-aḳhtar dikhā.ī dete haiñ

kabhī to the vahī taskīn-e-jāñ kā pahlū bhī

jo bazm-e-ġhair meñ aksar dikhā.ī dete haiñ

mujhī pe 'azrā' musallat hai pyaas kā sahrā

qadam qadam pe samundar dikhā.ī dete haiñ

dhuan dhuan sabhi manzar dikhai dete hain

mujhe sulagte hue ghar dikhai dete hain

mudafa'at ka saliqa bhi KHub-tar hai ye

har ek hath mein patthar dikhai dete hain

'aziz hain jo dil-o-jaan se bhi mujhe baDh kar

sada wahi to sitamgar dikhai dete hain

nazar uThati hun jab apne KHema-e-jaan par

qadam qadam baDe mahshar dikhai dete hain

qarib jaun to sahra ki misl hain wo bhi

teri nazar mein jo sagar dikhai dete hain

ye na-rasai ke sare andhere mujh tak hain

jo dur se mah-o-aKHtar dikhai dete hain

kabhi to the wahi taskin-e-jaan ka pahlu bhi

jo bazm-e-ghair mein aksar dikhai dete hain

mujhi pe 'azra' musallat hai pyas ka sahra

qadam qadam pe samundar dikhai dete hain