dhuan kaleje se mere nikla jala jo dil bas ki rashk kha kar

dhuāñ kaleje se mere niklā jalā jo dil bas ki rashk khā kar

vo rashk ye thā ki ġhair se Tuk hañsā thā chanchal misī lagā kar

faqat jo chitvan pe ġhaur kiije to vo bhī vo sehr hai ki jis kā

karishma banda ġhulām ġhamza daġhā.eñ naukar fareb chākar

ḳhirām kī hai vo tarz yaaro ki jis meñ nikleñ ka.ī adā.eñ

qadam jo rakhnā to tan ke rakhnā jo phir uThānā to Dagmagā kar

laTak meñ bandoñ kī dil jo aave to ḳhair bande hī us ko le leñ

vagarna aave to phir na chhoḌe udhar se baalā jhamak dikhā kar

majāl kyā hai jo dū-badū ho nazar se koī nazar laḌāve

magar kisī ne jo us ko dekhā to sau ḳharābī se chhup chhupā kar

sune kisī ke na dard-e-dil ko vagar sune to jhiḌak ke us ko

ye saaf kah de to kyā balā hai jo sar phirātā hai nāhaq aa kar

'nazīr' vo but hai dushman-e-jāñ na miliyo us se tū dekh hargiz

vagar milā to ḳhudā hai hāfiz bache haiñ ham bhī ḳhudā ḳhudā kar

dhuan kaleje se mere nikla jala jo dil bas ki rashk kha kar

wo rashk ye tha ki ghair se Tuk hansa tha chanchal misi laga kar

faqat jo chitwan pe ghaur kije to wo bhi wo sehr hai ki jis ka

karishma banda ghulam ghamza daghaen naukar fareb chaakar

KHiram ki hai wo tarz yaro ki jis mein niklen kai adaen

qadam jo rakhna to tan ke rakhna jo phir uThana to Dagmaga kar

laTak mein bandon ki dil jo aawe to KHair bande hi us ko le len

wagarna aawe to phir na chhoDe udhar se baala jhamak dikha kar

majal kya hai jo du-badu ho nazar se koi nazar laDawe

magar kisi ne jo us ko dekha to sau KHarabi se chhup chhupa kar

sune kisi ke na dard-e-dil ko wagar sune to jhiDak ke us ko

ye saf kah de to kya bala hai jo sar phiraata hai nahaq aa kar

'nazir' wo but hai dushman-e-jaan na miliyo us se tu dekh hargiz

wagar mila to KHuda hai hafiz bache hain hum bhi KHuda KHuda kar