دھند ہی دھند ہے رستے میں جہاں تک جاؤں

دھند ہی دھند ہے رستے میں جہاں تک جاؤں

روشنی تیرے تعاقب میں کہاں تک جاؤں

میری اوقات کہاں میں بھی مکیں دیکھ آؤں

بس یہی بات بڑی ہے کہ مکاں تک جاؤں

عقل کہتی ہے تری ساری تگ و دو بے سود

دل کہے عشق میں بے سود زیاں تک جاؤں

عین ممکن ہے جدائی کی گھڑی ٹل جائے

دل کا فرمان ہے میں حد گماں تک جاؤں

لذت دید کا اظہار کہاں ممکن ہے

آنکھ سے گر ملے فرصت تو زباں تک جاؤں

ہوش کھو کر جو سرور آئے اسے کیا کرنا

کوچۂ ہوش سے کیوں شہر مغاں تک جاؤں

ضبط کے بند ہدایت میں کہاں تک باندھوں

چشم تر درد بکف دشت فغاں تک جاؤں