dhul par qadmon ki hai tazin-kari ai hawa

dhuul par qadmoñ kī hai taz.īn-kārī ai havā

rakh bachā kar hai ye terī zimmedārī ai havā

maiñ ba-dast-e-mausam-e-gul huuñ vahī ik muTThī ret

munkashif hai tujh pe merī ḳhāksārī ai havā

peḌ paude sar-nigūñ haiñ maar se terī magar

bhuul mat abr-e-karam kī pāsdārī ai havā

dhuup kā sonā luTā kar kho gayā sūraj magar

ab bhī raste par hai us kī tāb-kārī ai havā

nisf shab sunsān pagDanDī pe raushan sham’-e-jism

saiñkaḌoñ manzar barahna ek naarī ai havā

kis kī shah par kashtiyāñ ġharqāb kartī hai batā

haath meñ kis ke hai mauj-e-iḳhtiyārī ai havā

dhul par qadmon ki hai tazin-kari ai hawa

rakh bacha kar hai ye teri zimmedari ai hawa

main ba-dast-e-mausam-e-gul hun wahi ek muTThi ret

munkashif hai tujh pe meri KHaksari ai hawa

peD paude sar-nigun hain mar se teri magar

bhul mat abr-e-karam ki pasdari ai hawa

dhup ka sona luTa kar kho gaya suraj magar

ab bhi raste par hai us ki tab-kari ai hawa

nisf shab sunsan pagDanDi pe raushan sham’-e-jism

sainkaDon manzar barahna ek nari ai hawa

kis ki shah par kashtiyan gharqab karti hai bata

hath mein kis ke hai mauj-e-iKHtiyari ai hawa