دھول پر قدموں کی ہے تزئین کاری اے ہوا

دھول پر قدموں کی ہے تزئین کاری اے ہوا

رکھ بچا کر ہے یہ تیری ذمہ داری اے ہوا

میں بدست موسم گل ہوں وہی اک مٹھی ریت

منکشف ہے تجھ پہ میری خاکساری اے ہوا

پیڑ پودے سرنگوں ہیں مار سے تیری مگر

بھول مت ابر کرم کی پاسداری اے ہوا

دھوپ کا سونا لٹا کر کھو گیا سورج مگر

اب بھی رستے پر ہے اس کی تاب کاری اے ہوا

نصف شب سنسان پگڈنڈی پہ روشن شمع جسم

سینکڑوں منظر برہنہ ایک ناری اے ہوا

کس کی شہہ پر کشتیاں غرقاب کرتی ہے بتا

ہاتھ میں کس کے ہے موج اختیاری اے ہوا