dhul se rah aTi ho gai manzil madum

dhuul se raah aTī ho ga.ī manzil ma.adūm

kyā ḳhabar kyā hai mire azm-e-safar kā maqsūm

jism ālūda-e-isyāñ hai magar ruuh mirī

kitnī pākīza nazar aatī hai kitnī ma.asūm

DhūñDh kar laao koī hādisa-e-qalb-o-nazar

shāyad ā.īna ho yuuñ ziist kā maḳhfī mafhūm

tire paikar kī jhalak daulat-e-ālam varna

rañg aur nuur ke is sail kī vaq.at mālūm

sūrat-e-harf-e-ġhalat miT ga.e ham tā ki sadā

lauh-e-duniyā pe rahe naam tumhārā marqūm

jur.at-e-jaur-o-sitam kab thī kisī meñ 'nāzish'

ḳhud mire hāthoñ rahī hai mirī hastī mazlūm

dhul se rah aTi ho gai manzil madum

kya KHabar kya hai mere azm-e-safar ka maqsum

jism aaluda-e-isyan hai magar ruh meri

kitni pakiza nazar aati hai kitni masum

DhunDh kar lao koi hadisa-e-qalb-o-nazar

shayad aaina ho yun zist ka maKHfi mafhum

tere paikar ki jhalak daulat-e-alam warna

rang aur nur ke is sail ki waqat malum

surat-e-harf-e-ghalat miT gae hum ta ki sada

lauh-e-duniya pe rahe nam tumhaara marqum

jurat-e-jaur-o-sitam kab thi kisi mein 'nazish'

KHud mere hathon rahi hai meri hasti mazlum