DhunDe na mera dil kisi gham-KHwar ka saya

DhūñDe na mirā dil kisī ġham-ḳhvār kā saaya

mil jaa.e agar aap kī dīvār kā saaya

is andhe kueñ se jo nikal kar koī dekhe

aatā hai nazar dhuup meñ ashjār kā saaya

zarḳhez hai miTTī usī shādāb zamīñ kī

jis par hai kisī abr-e-guhar-bār kā saaya

Dartā huuñ ki sun kar mire ash.ār-e-dil-afgār

paḌ jaa.e na is par ġham-o-afkār kā saaya

jab tak nahīñ marne kā ye ik jazba-e-īsār

phailā hai saroñ par rasan-o-dār kā saaya

aatā huuñ maiñ kar do shab-e-tīra ko ḳhabar-dār

siine meñ chhupā.e hue anvār kā saaya

luuTā na maza husn-e-nazar kā kabhī us ne

utrā na kabhī nargis-e-bīmār kā saaya

jiinā bhī hai mushkil ki 'ziyā' rahtā hai sar par

har lahza laTaktī huī talvār kā saaya

DhunDe na mera dil kisi gham-KHwar ka saya

mil jae agar aap ki diwar ka saya

is andhe kuen se jo nikal kar koi dekhe

aata hai nazar dhup mein ashjar ka saya

zarKHez hai miTTi usi shadab zamin ki

jis par hai kisi abr-e-guhar-bar ka saya

Darta hun ki sun kar mere ashaar-e-dil-afgar

paD jae na is par gham-o-afkar ka saya

jab tak nahin marne ka ye ek jazba-e-isar

phaila hai saron par rasan-o-dar ka saya

aata hun main kar do shab-e-tira ko KHabar-dar

sine mein chhupae hue anwar ka saya

luTa na maza husn-e-nazar ka kabhi us ne

utra na kabhi nargis-e-bimar ka saya

jina bhi hai mushkil ki 'ziya' rahta hai sar par

har lahza laTakti hui talwar ka saya