DhunDhta phirta hai kabe mein sanam hai ki nahin

DhūñDhtā phirtā hai ka.abe meñ sanam hai ki nahīñ

ai dil-e-nādāñ tujhe pās-e-haram hai ki nahīñ

phir vahī barq-e-tabassum ḳhirman-e-dil par girī

aap hī kahiye ki ye zulm-o-sitam hai ki nahīñ

ai masīhā-e-zamāna ye batā detā mujhe

jo jigar meñ dard hai mere vo kam hai ki nahīñ

jo ḳhalish bechain kar detī hai mujh ko baar baar

aap ke siine meñ bhī vo soz-e-ġham hai ki nahīñ

mere saaqī maiñ nahīñ aatā ghaTā le aa.ī hai

dekhūñ tū bhī mā.il-e-lutf-o-karam hai ki nahīñ

ab ke rahbar jo banā.eñ to parakh kar dekh leñ

ahl-e-dil ahl-e-nazar ahl-e-qalam hai ki nahīñ

paḌ ke hāthoñ meñ zamāne ke zarā 'hamdam' batā

zindagī vaqf-e-alam mashq-e-sitam hai ki nahīñ

DhunDhta phirta hai kabe mein sanam hai ki nahin

ai dil-e-nadan tujhe pas-e-haram hai ki nahin

phir wahi barq-e-tabassum KHirman-e-dil par giri

aap hi kahiye ki ye zulm-o-sitam hai ki nahin

ai masiha-e-zamana ye bata deta mujhe

jo jigar mein dard hai mere wo kam hai ki nahin

jo KHalish bechain kar deti hai mujh ko bar bar

aap ke sine mein bhi wo soz-e-gham hai ki nahin

mere saqi main nahin aata ghaTa le aai hai

dekhun tu bhi mail-e-lutf-o-karam hai ki nahin

ab ke rahbar jo banaen to parakh kar dekh len

ahl-e-dil ahl-e-nazar ahl-e-qalam hai ki nahin

paD ke hathon mein zamane ke zara 'hamdam' bata

zindagi waqf-e-alam mashq-e-sitam hai ki nahin