DhunDne KHud hi chala aata sukun-e-dil mujhe

DhūñDne ḳhud hī chalā aatā sukūn-e-dil mujhe

hāe-qismat tū ne rakhā bhī kisī qābil mujhe

iztirāb-e-shauq kahtā hai abhī chalte raho

de rahī hai dāvat-e-ḳhatm-e-safar manzil mujhe

maiñ to ye tai kar chukā thā ab na ā.ūñgā magar

khīñch laayā terī jānib iztirāb-e-dil mujhe

jalva vaj.h-e-be-ḳhudī o shauq vajh-e-iztirāb

mutma.in hone nahīñ detī koī mushkil mujhe

bahr-e-ulfat meñ mirī nākāmiyāñ uf al-amāñ

DhūñDhtā huuñ har taraf miltā nahīñ sāhil mujhe

uf kisī karvaT qarār aatā nahīñ shām-e-alam

kar diyā hai dard-e-dil ne is qadar bismil mujhe

rang laanā thā na laayā merā ḳhūn-e-ārzū

hashr meñ honā paḌā sharminda-e-qātil mujhe

phir usī pur-kaif aalam kī hai mujh ko justujū

phir vahī naġhma sunā de ai navā-e-dil mujhe

khul na jaa.e rāz-e-ulfat ahl-e-mahfil par kahīñ

aap rah rah kar na dekheñ yuuñ sar-e-mahfil mujhe

aa ga.e ashk-e-nadāmat un kī āñkhoñ meñ 'fazā'

dekhiye ab kyā dikhā.e jazba-e-kāmil mujhe

DhunDne KHud hi chala aata sukun-e-dil mujhe

hae-qismat tu ne rakha bhi kisi qabil mujhe

iztirab-e-shauq kahta hai abhi chalte raho

de rahi hai dawat-e-KHatm-e-safar manzil mujhe

main to ye tai kar chuka tha ab na aaunga magar

khinch laya teri jaanib iztirab-e-dil mujhe

jalwa wajh-e-be-KHudi o shauq wajh-e-iztirab

mutmain hone nahin deti koi mushkil mujhe

bahr-e-ulfat mein meri nakaamiyan uf al-aman

DhunDhta hun har taraf milta nahin sahil mujhe

uf kisi karwaT qarar aata nahin sham-e-alam

kar diya hai dard-e-dil ne is qadar bismil mujhe

rang lana tha na laya mera KHun-e-arzu

hashr mein hona paDa sharminda-e-qatil mujhe

phir usi pur-kaif aalam ki hai mujh ko justuju

phir wahi naghma suna de ai nawa-e-dil mujhe

khul na jae raaz-e-ulfat ahl-e-mahfil par kahin

aap rah rah kar na dekhen yun sar-e-mahfil mujhe

aa gae ashk-e-nadamat un ki aankhon mein 'faza'

dekhiye ab kya dikhae jazba-e-kaamil mujhe