DhunDte ho dil-e-figar mein kya

DhūñDte ho dil-e-figār meñ kyā

ho bhī saktā hai is mazār meñ kyā

lafz karte haiñ raqs chāroñ taraf

likhtā rahtā huuñ maiñ ḳhumār meñ kyā

martabe rif.ateñ maqām aur naam

aur hotā hai inkisār meñ kyā

chand sāñsoñ kī mohlatoñ ke evaz

us ne baḳhshā hai intizār meñ kyā

kis kī ḳhushbū mujhe bulātī hai

koī mahkā mire madār meñ kyā

jin kī miTTī ḳhizāñ se uTThī ho

mil sakegā unheñ bahār meñ kyā

chiḌh hai kyoñ ittihād se tum ko

dost barakat hai intishār meñ kyā

Dāchī vaale chale ga.e kab ke

sar khapāoge ab ġhubār meñ kyā

saath le kar nahīñ gayā kuchh maiñ

DhūñDte ho mire mazār meñ kyā

raat Duubī hai kyoñ añdhere meñ

chāñd niklā nahīñ dayār meñ kyā

DhunDte ho dil-e-figar mein kya

ho bhi sakta hai is mazar mein kya

lafz karte hain raqs chaaron taraf

likhta rahta hun main KHumar mein kya

martabe rifaten maqam aur nam

aur hota hai inkisar mein kya

chand sanson ki mohlaton ke ewaz

us ne baKHsha hai intizar mein kya

kis ki KHushbu mujhe bulati hai

koi mahka mere madar mein kya

jin ki miTTi KHizan se uTThi ho

mil sakega unhen bahaar mein kya

chiDh hai kyon ittihad se tum ko

dost barakat hai intishaar mein kya

Dachi wale chale gae kab ke

sar khapaoge ab ghubar mein kya

sath le kar nahin gaya kuchh main

DhunDte ho mere mazar mein kya

raat Dubi hai kyon andhere mein

chand nikla nahin dayar mein kya