dhup aati nahin ruKH apna badal kar dekhen

dhuup aatī nahīñ ruḳh apnā badal kar dekheñ

chaḌhte sūraj kī taraf ham bhī to chal kar dekheñ

baat kuchh hogī yaqīnan jo ye hote haiñ nisār

ham bhī ik roz kisī sham.a pe jal kar dekheñ

sāhib-e-jubba-o-dastār se kah de koī

is bulandī pe vo dekheñ to sambhal kar dekheñ

kyā ajab hai ki ye muTThī meñ hamārī aa jaa.e

āsmāñ kī taraf ik baar uchhal kar dekheñ

daaġh dāman pe kisī ke na koī haath hī tar

kyuuñ na chehre pe lahū apnā hī mal kar dekheñ

kis tarah samt-e-muḳhālif meñ safar karte haiñ ham

bahte dhāre se kabhī aap nikal kar dekheñ

ḳhaak meñ mil ke fanā hoñge jo motī haiñ yahāñ

jab bhī jī chāhe ye āñkhoñ se ubal kar dekheñ

yak-ba-yak jaañ se guzarnā to hai āsāñ 'anjum'

qatra qatra ka.ī qistoñ meñ pighal kar dekheñ

dhup aati nahin ruKH apna badal kar dekhen

chaDhte suraj ki taraf hum bhi to chal kar dekhen

baat kuchh hogi yaqinan jo ye hote hain nisar

hum bhi ek roz kisi shama pe jal kar dekhen

sahib-e-jubba-o-dastar se kah de koi

is bulandi pe wo dekhen to sambhal kar dekhen

kya ajab hai ki ye muTThi mein hamari aa jae

aasman ki taraf ek bar uchhal kar dekhen

dagh daman pe kisi ke na koi hath hi tar

kyun na chehre pe lahu apna hi mal kar dekhen

kis tarah samt-e-muKHalif mein safar karte hain hum

bahte dhaare se kabhi aap nikal kar dekhen

KHak mein mil ke fana honge jo moti hain yahan

jab bhi ji chahe ye aankhon se ubal kar dekhen

yak-ba-yak jaan se guzarna to hai aasan 'anjum'

qatra qatra kai qiston mein pighal kar dekhen