دھوپ ہی دھوپ ہے آنچل ہے نہ سایہ کوئی

دھوپ ہی دھوپ ہے آنچل ہے نہ سایہ کوئی

زندگی ہے کہ دہکتا ہوا صحرا کوئی

ایک اک کر کے سبھی وقت کے ساتھی بچھڑے

رہ گیا منزل امید پہ تنہا کوئی

موم کی طرح مرا جسم پگھلتے ہوئے دیکھ

اس گھڑی تو ہے مرے پاس کہ شعلہ کوئی

لوگ پتھراؤ کریں خاک اڑائیں کہ ہنسیں

بے نیازانہ گزر جائے گا ہم سا کوئی

سب کے سب کہنہ روایات کے رہرو نکلے

وقت کی چھاؤں میں اک پل بھی نہ ٹھہرا کوئی

ہے یہ انداز ستم گرم ہواؤں کا ضیاؔ

پیڑ کے جسم پہ باقی نہیں پتہ کوئی