دھوپ ہو تیز تو دیوار کا سایہ ہے بہت

دھوپ ہو تیز تو دیوار کا سایہ ہے بہت

چند یادوں کا اثاثہ بھی اثاثہ ہے بہت

بے بسی حلقۂ زنجیر بنی ہے یارو

زندگی ہم نے تجھے ٹوٹ کے چاہا ہے بہت

جیتے جی کتنے سوالوں سے چھڑائے دامن

آدمی اپنے گریبان سے الجھا ہے بہت

ٹوٹ جائے گا کسی دن بھی اندھیروں کا طلسم

سوچنے والوں کے ذہنوں میں اجالا ہے بہت

لوگ پھر لوگ ہیں رائی کا بناتے ہیں پہاڑ

اڑنے والوں کا ہنر ہم نے بھی دیکھا ہے بہت

ایک ایک لمحہ بھی برسوں کے برابر ہے جلیلؔ

قید تنہائی ہے دل اپنا اکیلا ہے بہت