dhup jab tak sar pe thi zer-e-qadam pae gae

dhuup jab tak sar pe thī zer-e-qadam paa.e ga.e

Dūbte sūraj meñ kitnī duur tak saa.e ga.e

aaj bhī harf-e-tasallī hai shikast-e-dil pe tanz

kitne jumle haiñ jo har mauqa.a pe dohrā.e ga.e

is zamīn-e-saḳht kā ab khodnā bekār hai

dafan the jo is ḳharābe meñ vo sarmā.e ga.e

dushmanoñ kī tañg-zarfī nāpne ke vāste

ham shikastoñ par shikasteñ umr bhar khaa.e ga.e

ab darinda khojiyoñ kī dastaras meñ aa gayā

nahr ke sāhil pe panjoñ ke nishāñ paa.e ga.e

aaj se maiñ apne har iqdām meñ āzād huuñ

jhāñkte the jo mire ghar meñ vo ham-sā.e ga.e

in galī-kūchoñ meñ bahnoñ kā muhāfiz kaun hai

kasb-e-zar kī dauḌ meñ bastī se māñ-jā.e ga.e

dhup jab tak sar pe thi zer-e-qadam pae gae

Dubte suraj mein kitni dur tak sae gae

aaj bhi harf-e-tasalli hai shikast-e-dil pe tanz

kitne jumle hain jo har mauqa pe dohrae gae

is zamin-e-saKHt ka ab khodna bekar hai

dafan the jo is KHarabe mein wo sarmae gae

dushmanon ki tang-zarfi napne ke waste

hum shikaston par shikasten umr bhar khae gae

ab darinda khojiyon ki dastaras mein aa gaya

nahr ke sahil pe panjon ke nishan pae gae

aaj se main apne har iqdam mein aazad hun

jhankte the jo mere ghar mein wo ham-sae gae

in gali-kuchon mein bahnon ka muhafiz kaun hai

kasb-e-zar ki dauD mein basti se man-jae gae