dhup kamre mein chali aai thi

dhuup kamre meñ chalī aa.ī thī

jab darīche se shanāsā.ī thī

shahr kā shahr umaD aaya thā

kyā ajab pursish-e-tanhā.ī thī

maiñ ne shamshīr banā lī us se

tum ne zanjīr jo pahnā.ī thī

kuchh to badlā hai bichhaḌ kar us se

raat kyoñ niiñd nahīñ aa.ī thī

shahr-e-girya ke shab-o-roz na pūchh

raat ke baa'd bhī raat aa.ī thī

tum ne samjhā thā navāzish jis ko

vo to zaḳhmoñ kī pazīrā.ī thī

us ne āñkhoñ se pukārā thā mujhe

merī lafzoñ se shanāsā.ī thī

vo to kaam aa ga.ī vahshat 'tāriq'

varna rusvā.ī hī rusvā.ī thī

dhup kamre mein chali aai thi

jab dariche se shanasai thi

shahr ka shahr umaD aaya tha

kya ajab pursish-e-tanhai thi

main ne shamshir bana li us se

tum ne zanjir jo pahnai thi

kuchh to badla hai bichhaD kar us se

raat kyon nind nahin aai thi

shahr-e-girya ke shab-o-roz na puchh

raat ke ba'd bhi raat aai thi

tum ne samjha tha nawazish jis ko

wo to zaKHmon ki pazirai thi

us ne aankhon se pukara tha mujhe

meri lafzon se shanasai thi

wo to kaam aa gai wahshat 'tariq'

warna ruswai hi ruswai thi