دھوپ کمرے میں چلی آئی تھی

دھوپ کمرے میں چلی آئی تھی

جب دریچے سے شناسائی تھی

شہر کا شہر امڈ آیا تھا

کیا عجب پرسش تنہائی تھی

میں نے شمشیر بنا لی اس سے

تم نے زنجیر جو پہنائی تھی

کچھ تو بدلا ہے بچھڑ کر اس سے

رات کیوں نیند نہیں آئی تھی

شہر گریہ کے شب و روز نہ پوچھ

رات کے بعد بھی رات آئی تھی

تم نے سمجھا تھا نوازش جس کو

وہ تو زخموں کی پذیرائی تھی

اس نے آنکھوں سے پکارا تھا مجھے

میری لفظوں سے شناسائی تھی

وہ تو کام آ گئی وحشت طارقؔ

ورنہ رسوائی ہی رسوائی تھی