dhup ki shiddat mein nange panw nange sar nikal

dhuup kī shiddat meñ nañge paañv nañge sar nikal

ai dil-e-sāda savād-e-jabr se bāhar nikal

kal kā sūraj shād-kāmī kī ḳhabar de yā na de

chhoḌ andeshe hisār-e-zāt se bāhar nikal

maiñ ka.ī sadiyoñ se gum huuñ ḳhvāb ke sakrāt meñ

āftāb-e-sub.h-e-bedārī mire sar par nikal

sāhiloñ par tere istiqbāl ko aayā hai kaun

Dūbne vaale ubhar phir sat.h-e-dariyā par nikal

'ahd dār-o-gīr hai apnā tashaḳhḳhus gum na kar

soch kī saarī fasīleñ toḌ kar bāhar nikal

tīsrī duniyā munavvar ho mire afkār se

mehr-e-āzādī mire ehsās ke andar nikal

apne ḳhadd-o-ḳhāl dekhūñ maiñ bhī ai sultān-'rashk'

merī āñkhoñ se magar ai ḳhvāb ke manzar nikal

dhup ki shiddat mein nange panw nange sar nikal

ai dil-e-sada sawad-e-jabr se bahar nikal

kal ka suraj shad-kaami ki KHabar de ya na de

chhoD andeshe hisar-e-zat se bahar nikal

main kai sadiyon se gum hun KHwab ke sakraat mein

aaftab-e-subh-e-bedari mere sar par nikal

sahilon par tere istiqbaal ko aaya hai kaun

Dubne wale ubhar phir sath-e-dariya par nikal

'ahd dar-o-gir hai apna tashaKHKHus gum na kar

soch ki sari fasilen toD kar bahar nikal

tisri duniya munawwar ho mere afkar se

mehr-e-azadi mere ehsas ke andar nikal

apne KHadd-o-KHal dekhun main bhi ai sultan-'rashk'

meri aankhon se magar ai KHwab ke manzar nikal