dhup mein baiThe hain bachche hath mein chhagal liye

dhuup meñ baiThe haiñ bachche haath meñ chhāgal liye

so ga.iiñ shāyad havā.eñ god meñ bādal liye

aa rahā hai chup ke tālāboñ meñ patthar pheñktā

ik julūs-e-kaudkāñ ko saath ik pāgal liye

in añdherī bastiyoñ meñ rakh na darvāza khulā

kaun aatā hai yahāñ apnā.ī kī mash.al liye

zaat meñ gum-sum yūñhī saḌkoñ pe din bhar ghūmnā

aur shab ko sochnā pahlū meñ dil be-kal liye

kyā ajab us par mahak hī jaa.eñ darmāñ ke gulāb

hai to ik shāḳh-e-nazar ummīd kī koñpal liye

aaj tak be-samtiyoñ kī rah-ravī ne kyā diyā

ab zarā dam le bhī lo 'bazmī' bahut kuchh chal liye

dhup mein baiThe hain bachche hath mein chhagal liye

so gain shayad hawaen god mein baadal liye

aa raha hai chup ke talabon mein patthar phenkta

ek julus-e-kaudkan ko sath ek pagal liye

in andheri bastiyon mein rakh na darwaza khula

kaun aata hai yahan apnai ki mashal liye

zat mein gum-sum yunhi saDkon pe din bhar ghumna

aur shab ko sochna pahlu mein dil be-kal liye

kya ajab us par mahak hi jaen darman ke gulab

hai to ek shaKH-e-nazar ummid ki konpal liye

aaj tak be-samtiyon ki rah-rawi ne kya diya

ab zara dam le bhi lo 'bazmi' bahut kuchh chal liye