dhup mein chhanw mein maujud hai unsur mera

dhuup meñ chhāñv meñ maujūd hai unsur merā

ek paikar meñ kahāñ qaid hai paikar merā

aks par us ke fidā hai dil-e-muztar merā

maiñ ne dekhā bhī nahīñ hai abhī dilbar merā

khiḌkiyāñ band rakhūñ kholūñ na darvāza bhī

koī haq hī nahīñ jaise mere ghar par merā

munqata.a ho gayā har rābta un se phir bhī

zikr ab bhī vo kiyā karte haiñ aksar merā

merī kashtī ko kināroñ ne Duboyā āḳhir

haath meñ haath liyā us ne bhī baḌh kar merā

dhuup Dhalne hī ko thī raat ke saa.e meñ 'sahar'

aa ke kis moḌ pe bigḌā hai muqaddar merā

dhup mein chhanw mein maujud hai unsur mera

ek paikar mein kahan qaid hai paikar mera

aks par us ke fida hai dil-e-muztar mera

main ne dekha bhi nahin hai abhi dilbar mera

khiDkiyan band rakhun kholun na darwaza bhi

koi haq hi nahin jaise mere ghar par mera

munqata ho gaya har rabta un se phir bhi

zikr ab bhi wo kiya karte hain aksar mera

meri kashti ko kinaron ne Duboya aaKHir

hath mein hath liya us ne bhi baDh kar mera

dhup Dhalne hi ko thi raat ke sae mein 'sahar'

aa ke kis moD pe bigDa hai muqaddar mera