دھوپ سمندر صحرا میں تھا

دھوپ سمندر صحرا میں تھا

اپنی ذات میں کیا کیا میں تھا

شعلے میں تھی پھول کی خوشبو

پھول کے اندر شعلہ میں تھا

جاگتی آنکھیں بھاگتے منظر

جانے کس کا سپنا میں تھا

بوڑھا مانجھی ٹوٹی کشتی

اپنے سفر میں تنہا میں تھا

میرے لہو سے چاند تھا روشن

تجھ بن جلتا سویرا میں تھا

باہر باہر تھی خاموشی

اندر اندر چیخا میں تھا

بیچ سمندر سیرابی تھی

ساحل ساحل پیاسا میں تھا

پیڑ سے الجھا پیڑ سے لپٹا

جیسے ہوا کا جھونکا میں تھا

روپ دھار کے جوگی جیسا

جنگل جنگل بھٹکا میں تھا

منزل کب تھی میرے سفر کی

پھر بھی سفر میں رہتا میں تھا

میرے لب پہ ہنسی تھی لیکن

درد میں ڈوبا نغمہ میں تھا

مجھ کو دیکھو میری غزل میں

آپ ہی اپنا لہجہ میں تھا