dhup se bar-sar-e-paikar kiya hai maine

dhuup se bar-sar-e-paikār kiyā hai maiñ ne

apne hī jism ko dīvār kiyā hai maiñ ne

jab bhī sailāb mire sar kī taraf aayā hai

apne hāthoñ ko hī patvār kiyā hai maiñ ne

jo parinde mirī āñkhoñ se nikal bhāge the

un ko lafzoñ meñ giraftār kiyā hai maiñ ne

pahle ik shahr tirī yaad se ābād kiyā

phir usī shahr ko mismār kiyā hai maiñ ne

bār-hā gul se jalāyā hai gulistānoñ ko

bār-hā aag ko gulzār kiyā hai maiñ ne

jāntā huuñ mujhe maslūb kiyā jā.egā

ḳhud ko sach kah ke gunahgār kiyā hai maiñ ne

dhup se bar-sar-e-paikar kiya hai main ne

apne hi jism ko diwar kiya hai main ne

jab bhi sailab mere sar ki taraf aaya hai

apne hathon ko hi patwar kiya hai main ne

jo parinde meri aankhon se nikal bhage the

un ko lafzon mein giraftar kiya hai main ne

pahle ek shahr teri yaad se aabaad kiya

phir usi shahr ko mismar kiya hai main ne

bar-ha gul se jalaya hai gulistanon ko

bar-ha aag ko gulzar kiya hai main ne

jaanta hun mujhe maslub kiya jaega

KHud ko sach kah ke gunahgar kiya hai main ne