dhup uThata hun ki ab sar pe koi bar nahin

dhuup uThātā huuñ ki ab sar pe koī baar nahīñ

beach dīvār hai aur sāya-e-dīvār nahīñ

shahr kī gasht meñ haiñ sub.h se saare mansūr

ab to mansūr vahī hai jo sar-e-dār nahīñ

mat suno mujh se jo āzār uThāne hoñge

ab ke āzār ye phailā hai ki āzār nahīñ

sochtā huuñ ki bhalā umr kā hāsil kyā thā

umr-bhar saañs liye aur koī ambār nahīñ

jin dukānoñ ne lagā.e the nigah meñ bāzār

un dukānoñ kā ye ronā hai ki bāzār nahīñ

ab vo hālat hai ki thak kar maiñ ḳhudā ho jā.ūñ

koī dildār nahīñ koī dil-āzār nahīñ

mujh se tum kaam na lo kaam meñ laao mujh ko

koī to shahr meñ aisā hai ki be-kār nahīñ

yād-e-āshob kā aalam to vo aalam hai ki ab

yaad mastoñ ko tirī yaad bhī darkār nahīñ

vaqt ko suud pe de aur na rakh koī hisāb

ab bhalā kaisā ziyāñ koī ḳharīdār nahīñ

dhup uThata hun ki ab sar pe koi bar nahin

beach diwar hai aur saya-e-diwar nahin

shahr ki gasht mein hain subh se sare mansur

ab to mansur wahi hai jo sar-e-dar nahin

mat suno mujh se jo aazar uThane honge

ab ke aazar ye phaila hai ki aazar nahin

sochta hun ki bhala umr ka hasil kya tha

umr-bhar sans liye aur koi ambar nahin

jin dukanon ne lagae the nigah mein bazar

un dukanon ka ye rona hai ki bazar nahin

ab wo haalat hai ki thak kar main KHuda ho jaun

koi dildar nahin koi dil-azar nahin

mujh se tum kaam na lo kaam mein lao mujh ko

koi to shahr mein aisa hai ki be-kar nahin

yaad-e-ashob ka aalam to wo aalam hai ki ab

yaad maston ko teri yaad bhi darkar nahin

waqt ko sud pe de aur na rakh koi hisab

ab bhala kaisa ziyan koi KHaridar nahin