دھیان محل میں بھی جو گوری آنے سے شرمائے

دھیان محل میں بھی جو گوری آنے سے شرمائے

درشن جل سے پھر کوئی کیسے نینن پیاس بجھائے

تاروں کی چلمن سے جھانکے پھولوں میں مسکائے

روپ نگر کی اس رانی کا گھونگھٹ کون اٹھائے

گورے مکھ پر کالی لٹ کچھ ایسی چھب دکھلائے

چاند پہ جیسے جھوم جھوم کر ناگ کوئی لہرائے

دودھیا ساری میں دمکے ہے یوں گوری کا روپ

جل دھارا کے نیچے جیسے کوئی آگ جلائے

چاند ہے جھومر تارے اس کی چولی کے ہیں پھول

گگن منڈل پر بیٹھی ہے وہ اپنی سیج بجائے

ہم ہیں دھرتی کے اندھیارے وہ آکاش کی جوت

اندھیارا جوتی سے آخر کیونکر نین ملائے

جنم جنم سے مدھر ملن کی آئی ہے یہی ریت

جان کرے جو ہنس کر ارپن درشن بھی وہی پائے