dida-e-mahw-e-mal hai pyare

dīda-e-mahv-e-māl hai pyāre

kuchh ajab dil kā haal hai pyāre

zindagī ik vabāl hai pyāre

maut terā visāl hai pyāre

maiñ to ḳhud hī huuñ munfa.il sar-e-hashr

tujh ko kyuuñ infi.āl hai pyāre

zaḳhm tīr-e-nigāh se dil kā

taaza har dam nihāl hai pyāre

qissa kotāh ḳhāna-e-dil meñ

tū hai terā ḳhayāl hai pyāre

dard kā apnī had se baḌh jaanā

zaḳhm kā aur malāl hai pyāre

jis ko kahte haiñ fitna-e-mahshar

vo bhī ik terī chaal hai pyāre

talib-e-do-jahāñ nahīñ 'afqar'

tujh se terā savāl hai pyāre

dida-e-mahw-e-mal hai pyare

kuchh ajab dil ka haal hai pyare

zindagi ek wabaal hai pyare

maut tera visal hai pyare

main to KHud hi hun munfail sar-e-hashr

tujh ko kyun infial hai pyare

zaKHm tir-e-nigah se dil ka

taza har dam nihaal hai pyare

qissa kotah KHana-e-dil mein

tu hai tera KHayal hai pyare

dard ka apni had se baDh jaana

zaKHm ka aur malal hai pyare

jis ko kahte hain fitna-e-mahshar

wo bhi ek teri chaal hai pyare

talib-e-do-jahan nahin 'afqar'

tujh se tera sawal hai pyare