dīda-o-dil meñ utar jaatā hai
har azaab aa ke Thahar jaatā hai
koī jī uThtā hai mujh meñ har roz
roz mujh maiñ koī mar jaatā hai
ye mulāqāt hai chaurāhe kī
dekhiye kaun kidhar jaatā hai
fikr ghar kī ho to vahshat chhūTe
kār-e-vahshat ho to ghar jaatā hai
raat kis tarah mirī jaañ guzre
din to daftar meñ guzar jaatā hai
ye jo tūfān hai us kā sahrā
ek hī mauj ke sar jaatā hai
ye junūñ kyā hai 'munavvar' tujh ko
kyuuñ sar-e-shām hī ghar jaatā hai
dida-o-dil mein utar jata hai
har azab aa ke Thahar jata hai
koi ji uThta hai mujh mein har roz
roz mujh main koi mar jata hai
ye mulaqat hai chaurahe ki
dekhiye kaun kidhar jata hai
fikr ghar ki ho to wahshat chhuTe
kar-e-wahshat ho to ghar jata hai
raat kis tarah meri jaan guzre
din to daftar mein guzar jata hai
ye jo tufan hai us ka sahra
ek hi mauj ke sar jata hai
ye junun kya hai 'munawwar' tujh ko
kyun sar-e-sham hi ghar jata hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.