dida-o-dil meri sarkar uTha lae hain

dīda-o-dil mirī sarkār uThā laa.e haiñ

ham qafas meñ bhī tirā pyaar uThā laa.e haiñ

kaise chhīneñge bhalā ham se mohabbat terī

ham tire kūcha-o-bāzār uThā laa.e haiñ

laakh vīrān sahī gosha-e-zindāñ lekin

ham to tere lab-o-ruḳhsār uThā laa.e haiñ

zañg-ālūd paḌe the tirī ġhaflat ke sabab

ham vahī dard ke hathiyār uThā laa.e haiñ

ham se bāñTī na ga.iiñ bachchoñ meñ ḳhushiyāñ ab ke

iid ke din rasan-o-dār uThā laa.e haiñ

husn-e-yūsuf tirī hurmat ko bachāne ke liye

ham yahāñ misr kā bāzār uThā laa.e haiñ

surḳh-rūī kī numā.ish thī sar-e-bazm-e-jahāñ

mire qātil mirī dastār uThā laa.e haiñ

maiñ to ik umr se ḳhāmosh paḌā thā 'safdar'

mere dushman mirā pindār uThā laa.e haiñ

dida-o-dil meri sarkar uTha lae hain

hum qafas mein bhi tera pyar uTha lae hain

kaise chhinenge bhala hum se mohabbat teri

hum tere kucha-o-bazar uTha lae hain

lakh viran sahi gosha-e-zindan lekin

hum to tere lab-o-ruKHsar uTha lae hain

zang-alud paDe the teri ghaflat ke sabab

hum wahi dard ke hathiyar uTha lae hain

hum se banTi na gain bachchon mein KHushiyan ab ke

id ke din rasan-o-dar uTha lae hain

husn-e-yusuf teri hurmat ko bachane ke liye

hum yahan misr ka bazar uTha lae hain

surKH-rui ki numaish thi sar-e-bazm-e-jahan

mere qatil meri dastar uTha lae hain

main to ek umr se KHamosh paDa tha 'safdar'

mere dushman mera pindar uTha lae hain