دیدار ماہتاب کا شب بھر نہیں ہوا

دیدار ماہتاب کا شب بھر نہیں ہوا

روشن مرے نصیب کا اختر نہیں ہوا

ہر دم وہی ہوا نہ تھی امید جس کی کچھ

ہونا جو لازمی تھا وہ اکثر نہیں ہوا

کیا فائدہ چراغ جلانے سے روز روز

کردار ہی مرا جو منور نہیں ہوا

اشعار کی کچھ آج بھی آمد ہے ہو رہی

یہ ذہن میرا آج بھی بنجر نہیں ہوا

برسوں سے کتنے دریا ہیں اس میں سما رہے

میٹھا مگر ابھی بھی سمندر نہیں ہوا

کوشش تو اس نے خوب کی جی جان سے مگر

پنجوں کے بل بھی وہ میرے ہم سر نہیں ہوا

اے زندگی کہوں میں تجھے کیسے الوداع

تجھ سے ابھی حساب برابر نہیں ہوا

اگیاتؔ غم نہ کر ہیں اگر تجھ میں خامیاں

دنیا میں کوئی شخص بھی یکسر نہیں ہوا