didar mahtab ka shab bhar nahin hua

dīdār māhtāb kā shab bhar nahīñ huā

raushan mire nasīb kā aḳhtar nahīñ huā

har dam vahī huā na thī ummīd jis kī kuchh

honā jo lāzmī thā vo aksar nahīñ huā

kyā fā.eda charāġh jalāne se roz roz

kirdār hī mirā jo munavvar nahīñ huā

ash.ār kī kuchh aaj bhī aamad hai ho rahī

ye zehn merā aaj bhī banjar nahīñ huā

barsoñ se kitne dariyā haiñ is meñ samā rahe

mīThā magar abhī bhī samundar nahīñ huā

koshish to us ne ḳhuub kī jī jaan se magar

panjoñ ke bal bhī vo mere ham-sar nahīñ huā

ai zindagī kahūñ maiñ tujhe kaise alvidā.a

tujh se abhī hisāb barābar nahīñ huā

'agyāt' ġham na kar haiñ agar tujh meñ ḳhāmiyāñ

duniyā meñ koī shaḳhs bhī yaksar nahīñ huā

didar mahtab ka shab bhar nahin hua

raushan mere nasib ka aKHtar nahin hua

har dam wahi hua na thi ummid jis ki kuchh

hona jo lazmi tha wo aksar nahin hua

kya faeda charagh jalane se roz roz

kirdar hi mera jo munawwar nahin hua

ashaar ki kuchh aaj bhi aamad hai ho rahi

ye zehn mera aaj bhi banjar nahin hua

barson se kitne dariya hain is mein sama rahe

miTha magar abhi bhi samundar nahin hua

koshish to us ne KHub ki ji jaan se magar

panjon ke bal bhi wo mere ham-sar nahin hua

ai zindagi kahun main tujhe kaise alwidaa

tujh se abhi hisab barabar nahin hua

'agyat' gham na kar hain agar tujh mein KHamiyan

duniya mein koi shaKHs bhi yaksar nahin hua