didar mein ek turfa didar nazar aaya

dīdār meñ ik turfa dīdār nazar aayā

har baar chhupā koī har baar nazar aayā

chhāloñ ko bayābāñ bhī gulzār nazar aayā

jab chheḌ par āmāda har ḳhaar nazar aayā

sub.h-e-shab-e-hijrāñ kī vo chāk-garebānī

ik ālam-e-nairañgī har taar nazar aayā

ho sabr ki betābī ummīd ki māyūsī

nairañg-e-mohabbat bhī be-kār nazar aayā

jab chashm-e-siyah terī thī chhā.ī huī dil par

is mulk kā har ḳhitta tātār nazar aayā

tū ne bhī to dekhī thī vo jaatī huī duniyā

kyā āḳhrī lamhoñ meñ bīmār nazar aayā

ġhash khā ke gire muusā allāh-rī māyūsī

halkā sā vo parda bhī dīvār nazar aayā

zarra ho ki qatra ho ḳhum-ḳhāna-e-hastī meñ

maḳhmūr nazar aayā sarshār nazar aayā

kyā kuchh na huā ġham se kyā kuchh na kiyā ġham ne

aur yuuñ to huā jo kuchh be-kār nazar aayā

ai ishq qasam tujh ko ma.amūra-e-ālam kī

koī ġham-e-furqat meñ ġham-ḳhvār nazar aayā

shab kaT ga.ī furqat kī dekhā na 'firāq' āḳhir

tūl-e-ġham-e-hijrāñ bhī be-kār nazar aayā

didar mein ek turfa didar nazar aaya

har bar chhupa koi har bar nazar aaya

chhaalon ko bayaban bhi gulzar nazar aaya

jab chheD par aamada har KHar nazar aaya

subh-e-shab-e-hijran ki wo chaak-garebani

ek aalam-e-nairangi har tar nazar aaya

ho sabr ki betabi ummid ki mayusi

nairang-e-mohabbat bhi be-kar nazar aaya

jab chashm-e-siyah teri thi chhai hui dil par

is mulk ka har KHitta tatar nazar aaya

tu ne bhi to dekhi thi wo jati hui duniya

kya aaKHri lamhon mein bimar nazar aaya

ghash kha ke gire musa allah-ri mayusi

halka sa wo parda bhi diwar nazar aaya

zarra ho ki qatra ho KHum-KHana-e-hasti mein

maKHmur nazar aaya sarshaar nazar aaya

kya kuchh na hua gham se kya kuchh na kiya gham ne

aur yun to hua jo kuchh be-kar nazar aaya

ai ishq qasam tujh ko mamura-e-alam ki

koi gham-e-furqat mein gham-KHwar nazar aaya

shab kaT gai furqat ki dekha na 'firaq' aaKHir

tul-e-gham-e-hijran bhi be-kar nazar aaya