didani hai zaKHm-e-dil aur aap se parda bhi kya

dīdanī hai zaḳhm-e-dil aur aap se parda bhī kyā

ik zarā nazdīk aa kar dekhiye aisā bhī kyā

ham bhī nā-vāqif nahīñ ādāb-e-mahfil se magar

chīḳh uTheñ ḳhāmoshiyāñ tak aisā sannāTā bhī kyā

ḳhud hamīñ jab dast-e-qātil ko duā dete rahe

phir koī apnī sitamgārī pe sharmātā bhī kyā

jitne ā.īne the sab TuuTe hue the sāmne

shīshagar bātoñ se apnī ham ko bahlātā bhī kyā

ham ne saarī zindagī ik aarzū meñ kaaT dī

farz kiije kuchh nahīñ khoyā magar paayā bhī kyā

be-mahābā tujh se aksar sāmnā hotā rahā

zindagī tū ne mujhe dekhā na ho aisā bhī kyā

be-talab ik justujū sī be-sabab ik intizār

umr-e-be-pāyāñ kā itnā muḳhtasar qissa bhī kyā

ġhair se bhī jab milā 'aḳhtar' to hañs kar hī milā

aadmī achchhā ho lekin is qadar achchhā bhī kyā

didani hai zaKHm-e-dil aur aap se parda bhi kya

ek zara nazdik aa kar dekhiye aisa bhi kya

hum bhi na-waqif nahin aadab-e-mahfil se magar

chiKH uThen KHamoshiyan tak aisa sannaTa bhi kya

KHud hamin jab dast-e-qatil ko dua dete rahe

phir koi apni sitamgari pe sharmata bhi kya

jitne aaine the sab TuTe hue the samne

shishagar baaton se apni hum ko bahlata bhi kya

hum ne sari zindagi ek aarzu mein kaT di

farz kije kuchh nahin khoya magar paya bhi kya

be-mahaba tujh se aksar samna hota raha

zindagi tu ne mujhe dekha na ho aisa bhi kya

be-talab ek justuju si be-sabab ek intizar

umr-e-be-payan ka itna muKHtasar qissa bhi kya

ghair se bhi jab mila 'aKHtar' to hans kar hi mila

aadmi achchha ho lekin is qadar achchha bhi kya