دیجے نہیں کسو کو تو پھر لیجیے بھی نئیں

دیجے نہیں کسو کو تو پھر لیجیے بھی نئیں

نیکی نہ بن سکے تو بدی کیجیے بھی نئیں

توقیر‌ حسن شرط ہے دل دینے کے لیے

گر حسن ہی نہ ہو تو کبھو ریجھیے بھی نئیں

ہووے اگرچہ اپنی شرافت اوپر نگاہ

ہرگز بدی کے کام پہ دل دیجیے بھی نئیں

ایدھر سے سیتے جاؤ اور اودھر سے پھٹتا جائے

ایسے طرح کے کپڑے کو پھر سیجیے بھی نئیں

دینا دلانا سارا ہے اک نام کے لیے

گر نام بھی نہ ہو تو عبث چھیجیے بھی نئیں

کوئی سا معاملہ ہو پہلے چھان لیجئے

یک بارگی بھڑک کے کبھو کیجیے بھی نئیں

مے کا مزا جبھی ہے کہ جب ماہ رو ہو پاس

گر ماہ رو نہ ہووے تو مے پیجیے بھی نئیں