دین الگ مذہب الگ مسلک الگ شیوہ الگ

دین الگ مذہب الگ مسلک الگ شیوہ الگ

اہل دنیا سے رہی ہر دم مری دنیا الگ

دین الگ مجھ سے ہوا مجھ سے ہوئی دنیا الگ

کیا کہوں تجھ سے الگ ہو کر ہوا کیا کیا الگ

بزم ہستی میں سکوں ہوتا میسر کس لیے

زندگی کے غم الگ تھے موت کا کھٹکا الگ

ناظر و نظارہ میں کیوں کر ہو باہم ارتباط

عشق کا عالم الگ ہے ہوش کی دنیا الگ

بار احساں کیوں اٹھائیں خضر کی تقلید کا

ہم نکالیں گے خود اپنی زیست کا رستہ الگ

تو ہے جگنو تیری ہستی ہی سراپا نور ہے

ہو نہیں سکتا کبھی تجھ سے ترا جلوہ الگ

حضرت دل سے نبھائیں کس طرح ہم اے جلیسؔ

ہے ازل ہی سے مزاج اس کا الگ اپنا الگ