din alag mazhab alag maslak alag shewa alag

diin alag maz.hab alag maslak alag sheva alag

ahl-e-duniyā se rahī har dam mirī duniyā alag

diin alag mujh se huā mujh se huī duniyā alag

kyā kahūñ tujh se alag ho kar huā kyā kyā alag

bazm-e-hastī meñ sukūñ hotā mayassar kis liye

zindagī ke ġham alag the maut kā khaTkā alag

nāzir-o-nazzāra meñ kyūñkar ho bāham irtibāt

'ishq kā 'ālam alag hai hosh kī duniyā alag

bār-e-ehsāñ kyoñ uThā.eñ ḳhizr kī taqlīd kā

ham nikāleñge ḳhud apnī ziist kā rasta alag

tū hai jugnū terī hastī hī sarāpā nuur hai

ho nahīñ saktā kabhī tujh se tirā jalva alag

hazrat-e-dil se nibhā.eñ kis tarah ham ai 'jalīs'

hai azal hī se mizāj is kā alag apnā alag

din alag mazhab alag maslak alag shewa alag

ahl-e-duniya se rahi har dam meri duniya alag

din alag mujh se hua mujh se hui duniya alag

kya kahun tujh se alag ho kar hua kya kya alag

bazm-e-hasti mein sukun hota mayassar kis liye

zindagi ke gham alag the maut ka khaTka alag

nazir-o-nazzara mein kyunkar ho baham irtibaat

'ishq ka 'alam alag hai hosh ki duniya alag

bar-e-ehsan kyon uThaen KHizr ki taqlid ka

hum nikalenge KHud apni zist ka rasta alag

tu hai jugnu teri hasti hi sarapa nur hai

ho nahin sakta kabhi tujh se tera jalwa alag

hazrat-e-dil se nibhaen kis tarah hum ai 'jalis'

hai azal hi se mizaj is ka alag apna alag