diwana apna kaun sa aalam dikha gaya

dīvāna apnā kaun sā aalam dikhā gayā

un ke laboñ pe ek tabassum sā aa gayā

muddat se zindagī meñ nahīñ koī inqalāb

shāyad tirā firāq mujhe raas aa gayā

tum par hī kuchh asar na huā aur bārhā

dushman bhī mere haal pe aañsū bahā gayā

un se barāh-e-rāst huī jab na guftugū

ashkoñ ke vāste se payām-e-vafā gayā

naqsh-o-nigār-e-dāman-e-sahrā ko ho naved

maiñ ya.anī ek ābla-pā aur aa gayā

ab is kā kyā ilaaj ki un kā har ik sitam

kuchh aur e'timād-e-mohabbat baḌhā gayā

vo bazm aur jur.at-e-iz.hār-e-zindagī

ik maiñ hī thā ki tohmat-e-hastī uThā gayā

afsurda bazm-e-māh ho yā sham.a-e-ashk-bār

parvāna apnā jashn-e-charāġhāñ manā gayā

un kā karam to aaj bhī hai dastgīr-e-shauq

'bāsit' magar hamīñ meñ koī farq aa gayā

diwana apna kaun sa aalam dikha gaya

un ke labon pe ek tabassum sa aa gaya

muddat se zindagi mein nahin koi inqalab

shayad tera firaq mujhe ras aa gaya

tum par hi kuchh asar na hua aur barha

dushman bhi mere haal pe aansu baha gaya

un se barah-e-rast hui jab na guftugu

ashkon ke waste se payam-e-wafa gaya

naqsh-o-nigar-e-daman-e-sahra ko ho nawed

main yani ek aabla-pa aur aa gaya

ab is ka kya ilaj ki un ka har ek sitam

kuchh aur e'timad-e-mohabbat baDha gaya

wo bazm aur jurat-e-izhaar-e-zindagi

ek main hi tha ki tohmat-e-hasti uTha gaya

afsurda bazm-e-mah ho ya shama-e-ashk-bar

parwana apna jashn-e-charaghan mana gaya

un ka karam to aaj bhi hai dastgir-e-shauq

'basit' magar hamin mein koi farq aa gaya