diwana dorahe pe khaDa soch raha hai

dīvāna dorāhe pe khaḌā soch rahā hai

ka.abe meñ ḳhudā hai to sanam-ḳhāne meñ kyā hai

saaqī kī nigāhoñ se jo sarshār huā hai

paimāna uThāne kī zarūrat use kyā hai

uljhī huī zulfeñ tirī suljhā.eñge kaise

vo log jinheñ gardish-e-daurāñ se gila hai

ye manzil-e-furqat pe shab-e-hijr kā aalam

tāroñ kī tarah dil bhī mirā Duub rahā hai

kuchh rahzan-o-rahbar pe hī mauqūf hai hamdam

is daur meñ dekho jise dīvāna huā hai

mai-kash haiñ na saaqī hai na sāġhar hai na baada

rindo mere maiḳhāne kī tarkīb judā hai

tūfān kī har mauj se ai 'shād' yahī pūchh

kuchh Dūbne vāloñ kā batā tujh ko patā hai

diwana dorahe pe khaDa soch raha hai

kabe mein KHuda hai to sanam-KHane mein kya hai

saqi ki nigahon se jo sarshaar hua hai

paimana uThane ki zarurat use kya hai

uljhi hui zulfen teri suljhaenge kaise

wo log jinhen gardish-e-dauran se gila hai

ye manzil-e-furqat pe shab-e-hijr ka aalam

taron ki tarah dil bhi mera Dub raha hai

kuchh rahzan-o-rahbar pe hi mauquf hai hamdam

is daur mein dekho jise diwana hua hai

mai-kash hain na saqi hai na saghar hai na baada

rindo mere maiKHane ki tarkib juda hai

tufan ki har mauj se ai 'shad' yahi puchh

kuchh Dubne walon ka bata tujh ko pata hai