diwana-war un se mulaqat ho kabhi

dīvāna-vār un se mulāqāt ho kabhī

lab-basta ham kaheñge agar baat ho kabhī

āñkheñ hoñ band aur nigāhoñ meñ vo raheñ

āñgan meñ āftāb ho vo raat ho kabhī

is bahr-e-be-kanār meñ sahrā haiñ maujzan

dil meñ bahār laa.e vo barsāt ho kabhī

tohfe meñ jaan pesh kareñge huzūr ham

shāyān-e-shān aap ke sauġhāt ho kabhī

karte rahe haiñ aap hamārī nafī sadā

badleñ muāmlāt gar isbāt ho kabhī

ham aaj is umiid pe baazī lagā.eñge

jaur-o-sitam ko aap kī shah-māt ho kabhī

garche tavaqquāt 'hidāyat' haiñ be-samar

shāyad vafāoñ kī bhī mukāfāt ho kabhī

diwana-war un se mulaqat ho kabhi

lab-basta hum kahenge agar baat ho kabhi

aankhen hon band aur nigahon mein wo rahen

aangan mein aaftab ho wo raat ho kabhi

is bahr-e-be-kanar mein sahra hain maujzan

dil mein bahaar lae wo barsat ho kabhi

tohfe mein jaan pesh karenge huzur hum

shayan-e-shan aap ke saughat ho kabhi

karte rahe hain aap hamari nafi sada

badlen muamlat gar isbaat ho kabhi

hum aaj is umid pe bazi lagaenge

jaur-o-sitam ko aap ki shah-mat ho kabhi

garche tawaqquat 'hidayat' hain be-samar

shayad wafaon ki bhi mukafat ho kabhi