دیوانہ وار ان سے ملاقات ہو کبھی

دیوانہ وار ان سے ملاقات ہو کبھی

لب بستہ ہم کہیں گے اگر بات ہو کبھی

آنکھیں ہوں بند اور نگاہوں میں وہ رہیں

آنگن میں آفتاب ہو وہ رات ہو کبھی

اس بحر بے کنار میں صحرا ہیں موجزن

دل میں بہار لائے وہ برسات ہو کبھی

تحفے میں جان پیش کریں گے حضور ہم

شایان شان آپ کے سوغات ہو کبھی

کرتے رہے ہیں آپ ہماری نفی سدا

بدلیں معاملات گر اثبات ہو کبھی

ہم آج اس امید پہ بازی لگائیں گے

جور و ستم کو آپ کی شہ مات ہو کبھی

گرچہ توقعات ہدایتؔ ہیں بے ثمر

شاید وفاؤں کی بھی مکافات ہو کبھی