diwangi-e-shauq ka saman saja ke la

dīvāngī-e-shauq kā sāmāñ sajā ke lā

nādāñ guhar koī sar-e-mizhgāñ sajā ke lā

fankār tū agar hai to fan kā dikhā kamāl

tasvīr-e-yār tā-had-e-imkāñ sajā ke lā

gulshan pe hai ḳhizāñ kā tasallut to ġham nahīñ

dil meñ fareb-e-husn-e-bahārāñ sajā ke lā

de māhtāb ban ke añdheroñ ko raushnī

murda diloñ ke vāste darmāñ sajā ke lā

ham aaj terī qaid se āzād ho ga.e

ai zindagī ab aur hī zindāñ sajā ke lā

phir zaḳhm mundamil hue jaate haiñ ai nadīm

tū merā mehrbāñ hai namak-dāñ sajā ke lā

aalam kā jo 'shafīq' hai rahmat hai sar-basar

us kā ḳhayāl nazd-e-rag-e-jāñ sajā ke lā

diwangi-e-shauq ka saman saja ke la

nadan guhar koi sar-e-mizhgan saja ke la

fankar tu agar hai to fan ka dikha kamal

taswir-e-yar ta-had-e-imkan saja ke la

gulshan pe hai KHizan ka tasallut to gham nahin

dil mein fareb-e-husn-e-bahaaran saja ke la

de mahtab ban ke andheron ko raushni

murda dilon ke waste darman saja ke la

hum aaj teri qaid se aazad ho gae

ai zindagi ab aur hi zindan saja ke la

phir zaKHm mundamil hue jate hain ai nadim

tu mera mehrban hai namak-dan saja ke la

aalam ka jo 'shafiq' hai rahmat hai sar-basar

us ka KHayal nazd-e-rag-e-jaan saja ke la