diwanon par hath na Dalo is zid mein pachhtaoge

dīvānoñ par haath na Daalo is zid meñ pachhtāoge

saare shahr meñ kis kis ko tum zanjīreñ pahnāoge

kyā sahrā kī taptī miTTī apnā sar na uThā.egī

tum to ye dīvār baḌhā kar sahrā tak le jāoge

ham bhī duā karte haiñ ki tum muḳhtār-e-sarīr-e-koh bano

lekin tum se milnā kyā hai patthar hī barsāoge

bazm-ārā.ī achchhī lekin aisī bazm-ārā.ī kyā

dāman dāman aag lagā dī aur charāġh jalāo.ge

phuul haiñ koī ḳhaar nahīñ ham aao ham meñ aa baiTho

ḳhushbū meñ ābād rahoge ḳhushbū hī kahlāoge

āñkheñ nīchī kar lo raat ke raste nā-hamvār bhī haiñ

chāñd ko takte chalne vaalo dekho Thokar khāoge

harf to kār-e-kilk-o-zubāñ hai naql-e-harf to āsāñ hai

zaḳhm koī tasvīr nahīñ hai jis ke naqsh banāoge

dar ko chhoḌā dair ko chhoḌā daar meñ ab hai dil yaaro

kyā unvān tarāshoge ab kyā ilzām lagāoge

diwanon par hath na Dalo is zid mein pachhtaoge

sare shahr mein kis kis ko tum zanjiren pahnaoge

kya sahra ki tapti miTTi apna sar na uThaegi

tum to ye diwar baDha kar sahra tak le jaoge

hum bhi dua karte hain ki tum muKHtar-e-sarir-e-koh bano

lekin tum se milna kya hai patthar hi barsaoge

bazm-arai achchhi lekin aisi bazm-arai kya

daman daman aag laga di aur charagh jalaoge

phul hain koi KHar nahin hum aao hum mein aa baiTho

KHushbu mein aabaad rahoge KHushbu hi kahlaoge

aankhen nichi kar lo raat ke raste na-hamwar bhi hain

chand ko takte chalne walo dekho Thokar khaoge

harf to kar-e-kilk-o-zuban hai naql-e-harf to aasan hai

zaKHm koi taswir nahin hai jis ke naqsh banaoge

dar ko chhoDa dair ko chhoDa dar mein ab hai dil yaro

kya unwan tarashoge ab kya ilzam lagaoge