diwar-e-dil se lipTi hui yaad aur hai

dīvār-e-dil se lipTī huī yaad aur hai

dar se juḌe fasānoñ kī ta.adād aur hai

be-ḳhvābiyoñ ko ġhaur se dekhā to ye khulā

ḳhvāboñ meñ ek rang tire baad aur hai

chāhūñ to maslahat ko farīza qarār duuñ

par kyā karūñ ki sunnat-e-ajdād aur hai

vīrāniyāñ haiñ mere mazāfāt meñ magar

duniyā koī vajūd meñ ābād aur hai

ā.īna-e-ḳhayāl ke aksoñ ne kah diyā

ham se varā sipāh-e-adam-zād aur hai

dariyā ke biich bhuul rahā huuñ shanāvarī

sāhil pe kyā ḳhabar koī uftād aur hai

tabdīl is qadar hī sazā ho sakī mirī

is baar mere vāste jallād aur hai

diwar-e-dil se lipTi hui yaad aur hai

dar se juDe fasanon ki tadad aur hai

be-KHwabiyon ko ghaur se dekha to ye khula

KHwabon mein ek rang tere baad aur hai

chahun to maslahat ko fariza qarar dun

par kya karun ki sunnat-e-ajdad aur hai

viraniyan hain mere mazafat mein magar

duniya koi wajud mein aabaad aur hai

aaina-e-KHayal ke akson ne kah diya

hum se wara sipah-e-adam-zad aur hai

dariya ke bich bhul raha hun shanawari

sahil pe kya KHabar koi uftad aur hai

tabdil is qadar hi saza ho saki meri

is bar mere waste jallad aur hai